Un ‘pes’ di Çopule al nade intal aiar a Vignesie

Al Salon Nautic di Vignesie al è ancje il grant pes svolant progjetât di Roberto Pagura, diretôr artistic e ‘farie’ creative dal Molino Rosenkranz. La domande e je rivade ae associazion culturâl cun sede a Castions di Çopule de direzion artistiche di Vele SpA, la societât dal Comun di Vignesie che e organize ducj i avigniments plui grancj tant che il Salon Nautic, che fint ai 4 di Jugn al met in mostre lis ecelencis de nautiche di dipuart internazionâl. Il pes – une struture lungje plui di 7 metris, largje 3 e alte plui o mancul 5 – al “nade” intal aiar, a 15 metris di tiere, dongje de innomenade opare “Building Bridges” dal scultôr italoamerican Lorenzo Quinn, il fi dal grant atôr Anthony Quinn. (A.I.) – 01.06.2023