Zornade di grant lavôr chê di îr pai volontaris dal Socors Alpin. Pôc dopo misdì il prin intervent de stazion di For Disore par judâ une femine che si è sintude mâl intant che e tornave indaûr dilunc de ferade Cassiopea cun dôs amiis. La femine e je stade tirade su’ cul elicotar e puartade tal ospedâl di Tumieç.
Tor lis dôs e mieze doi volontaris de stazion di Rabil che a lavorin li dal ripâr di Brazzà a àn cjapât prime la clamade di une femine che si sintive une vore strache e dal om che le compagnave che si sintive pôc ben, intant che a vignivin ju’ di Forcje Disteis. I doi a son rivâts di bessôi li dal ripâr, ma il zovin nol stave par nuie ben e cussì i volontaris lu àn puartât ju’ cuntune auto par dopo clamâ ancje une ambulance.
Un om di 82 agns si è sintût mâl pe masse strache su la mont For, indulà che al è rivât il fûrstrade de stazion di Rabil par puartâlu ju’ a Fusine. A pene rivâts i volontaris a àn scugnût tornâ a partî parcè che un altri vecjo si jere sintût mâl pe strache intant che al vignive ju’ dal ripâr Zacchi.
Par finî, tra lis cuatri e lis cinc dopomisdì a For Davôtri i volontaris dal Socors alpin a son lâts cul fûrstrade bande il ripâr Tolazzi parcè che une femine si jere fate mâl al cuel dal pît intant che e vignive ju’ dal ripâr Lambertenghi Volaia. (a.d.g.) – 05.08.2024
