Vie libare de Zonte regjonâl al Plan di dimensionament de rêt scolastiche e de programazion de ufierte formative in Friûl-Vignesie Julie pal an scolastic 2024/2025, che al previôt gnovis agregazions di istitûts, che dîs di chescj a jerin cence dirigjent scolastic efetîf. Intal detai in province di Udin e sarà la fusion fra i istitûts di Palaçûl cun Rivignan Teôr; la agregazion dal Istitût comprensîf di S. Pieri dai Sclavons cul Convit “Diacono” di Cividât; la fusion tra i istitûts di “Maian e Forgjarie” e Buie; Listize e Talmassons a saran intune cun Mortean-Cjasteons di Strade. Intal Friûl ocidentâl fusion tra i istitûts di Cjasarse e Voleson e tra Brugnere e Prate. Intal Friûl orientâl, lis misuris di razionalizazion a previodin la union di Gardiscje e Foian Redipulie e S. Canzian dal Lusinç cun Grau. A Triest, la fusion e rivuarde i istitûts comprensîfs “M. Hack” e “Roiano-Meschine”. Previodude ancje la sopression dal comprensîf “Bergamas” e la agregazion de “Duca D’Aosta” a “Ai Campi Elisi” e la agregazion de primarie “Slataper” e de secondarie di prin grât “Bergamas” al Istitût comprensîf “Weiss”. Ipotizâts la ativazion dal Liceu des siencis aplicadis al Diacun di Cividât e dal Liceu a indreçament sportîf dongje la sede dal Istitût “Di Brazzà” di Lignan.
L’assessôr regjonâl ae Istruzion Alessia Rosolen e aferme di capî i pinsîrs causâts dal cambiament, ma e invide ducj a no creâ alarmisims. L’assessôr e à precisât che “no vegnin incorporadis classis, nol ven ridot il personâl e a chest risultât si è rivâts cul dialic tra dutis lis parts”. Duris lis oposizions dal Pd ai 5 Stelle, che a àn sotlineât cemût che chest nol puedi jessi un model just pe scuele dal Friûl-Vignesie Julie. (a.d.g.) – 04.12.2023
