I contrascj dentri de maiorance gradesane di Centridiestre a àn puartât îr aes dimissions dai trê conseîrs di Fratelli d’Italia intune cun chei de oposizion. Il consei comunâl, la zonte e di consecuence il sindic Claudio Kovatsch a decjadin des lôr funzions e la legjislature si ferme dopo a pene doi agns. Nol è bastât l’incuintri dal centridiestre a Triest de setemane passade, sot de sorevision dal president regjonâl Fedriga, che al so tiermin la sbregadure e pareve mendade tant che il sindic al veve fevelât di “pas indenant”.
La tregue e je durade une vore pôc. La fin anticipade di un mandât no je une novitât par Grau: propri Kovatsch intal 2015 al jere stât nomenât comissari de Regjon dopo il disfasiment dal consei comunâl a cause, ancje chê volte, des dimissions di nûf conseîrs. E inte isule cumò al rivarà un gnûf comissari, che al aministrarà la citât fin aes elezions prossimis. (a.d.g.) – 28.09.23
