Cjar sintetiche prodote cun bioreattôrs e stampantis 3D, cence plui bisugn di arlevament, vacjis e passons. No je la trame di un cine di fantasience, ma un progjet puartât indenant di societâts multinazionâls potentis. Une idee rivoluzionarie che, se e ves di cjatâ spuinde intes istituzions europeanis, e larès a pericul di meti in zenoglon la agriculture taliane cun dute la sô tradizion. Cuintri la prospetive de mangjative in provin si bat di timp Coldiretti, cuntune campagne che a nivel nazionâl al à tirât su za 400 mil firmis. Vuê si è zontade ancje chê dal president dal Consei regjonâl, Piero Mauro Zanin.
“I grancj grups di interès multinazionâls – i àn sclarît vuê a Udin Cesare Magalini, diretôr di Coldiretti F-Vj, e Gino Vendrame, president dal branc udinês de associazion – le clamin cjar coltivade, un non tant social, ancje se chi la tiere no jentre nuie. E a intabarin la propueste di ambientalisim, stant che si ridusaressin lis emissions leadis al consum de aghe e ae produzion di mangjaduris. In plui, a disin di jessi movûts di resons umanitariis, parcè che la mangjative sintetiche e podarès risolvi il probleme de fam intal mont”.
Si trate però, a ribatin i dirigjents di de associazion dai agricultôrs, di un cjistiel ideologjic tant fragjil, “dal moment che nol ven sclarît cetante energjie si doprarès intai bioreatôr, intant che lis celulis gjavadis par fâ la mangjative sintetiche a vignaressin dai nassints dai nemâi, in barbe al benstâ animâl. Ancje il nobil intindiment di disfamâ i puars – a zontin Vendrame e Megalini – al bat cui pericui potenziâi de mangjative in provin, mai sperimentât e cause pussibile di malatiis par chês personis. Cence contâ l’atac ae nestre economie e ae nestre culture, ai prodots sans dai nestris agricultôrs, che nô o promovìn cun etichetadure, segnabilitât e iniziativis tant che Cjampagne amie”.
Dutis considerazions condividudis al cent par cent di Zanin. “O fâs i compliments a Coldirets par cheste iniziative – al à dit il president, ospit de sede udinese de associazion in vie Denêl Moro – e o poi dal dut la vuestre bataie, puartantsi la solidarietât de assemblee legjislative regjonâl. (A.D.G.) – 18.01.2023
