“O vin di meti lis minorancis dentri il nestri Statût. O vin di vê il cûr di completâ chest passaç tacât 60 agns indaûr e che, par vie dal moment gjeopolitic delicât che si viveve a Nordest intal ’63, nol è stât cjapât dentri, se no in misure margjinâl, trasformantlu in testemoneance de capacitât di autoguvier di cheste Regjon”.
Cussì Piero Mauro Zanin, president dal Consei regjonâl, dilunc dal so intervent in Aule in ocasion dal 60° aniversari dal Statût dal Friûl-Vignesie Julie. Par rimarcâ la impuartance des minorancis linguistichis presintis in regjon (sloven, furlan, todesc), Zanin al à let un salût intai varis idiomis, in plui che par talian.
L’assessôr regjonâl aes Autonomiis locâls Pierpaolo Roberti al à visât che “la autonomie le difindìn mantignint il Statût al pas cui timps e prestant atenzion a cemût che le doprìn che pe sô evoluzion – al à evidenziât – a van graciâts ancje i conseîrs, i assessôrs e i presidents che nus àn precedût”.
“I 60 agns di autonomie regjonâl a àn un significât impuartant, ben plui di une celebrazion semplice: e à di jessi une riflession sul “cemût che” il Friûl-Vignesie Julie al à doprât la sô specialitât a pro dai citadins, des istituzions locâls e des impresis e su cemût che cheste e pues jessi inzornade. Une Regjon Speciâl, la nestre – al à dit il cjâf grup dal Pd in Consei regjonâl, Diego Moretti – ancje parcè che di confin, plurâl e policentriche, che intal gnûf contest european e à di rinfuarçâ simpri plui il propri rûl internazionâl”.
Pai conseîrs dal Polo Liberale Giuseppe Nicoli, Walter Zalukar e Emanuele Zanon: “Lis resons storichis che a àn puartât a dâ la specialitât al Friûl-Vignesie Julie a puedin jessi in ultin trê: la presince e la tutele necessarie di minorancis linguistichis, la posizion gjeografiche e gjeopolitiche inte epoche de Vuere Frede cu la situazion dificile di Triest e il sotsvilup economic di buine part de regjon, marturizade massime de II Vuere Mondiâl”. (A.D.G.)
