“Dentri dai mês prossims, o volin sierâ il progjet che al puartarà ae istituzion, inte sede de Protezion civîl di Palme, di un portâl unic e di un pont unic di acès des imagjins metint in conession ducj i sistemis di videocontrol difondûts sul teritori regjonâl. L’obietîf al è chel di condividi la azion tra dutis lis fuarcis dal ordin par rispuindi ai citadins in maniere ancjemò plui eficiente sul front des investigazions e de sigurece”.
Lu à dit vuê l’assessôr regjonâl ae Sigurece, Pierpaolo Roberti, intervignint a Pordenon intun incuintri inte sede de Regjon clamât dal prefet Natalino Domenico Manno, li che a àn partecipât i sindics dal Friûl ocidentâl. Obietîf dal incuintri al jere fâ il pont su ciertis cuistions che a tocjin la sigurece, tant che la istituzion dai nuclis des Poliziis comunâls sui reâts ambientâi, i distrets di Polizie locâl sui teritoris, il control di vicinât e il coordenament dai sistemis di videocontrol e leture targhis. “Lis Poliziis locâls – al à sotlineât Roberti – simpri plui a son atôrs centrâi, parcè che a son in prime linee cul citadin e a son presints in maniere capilâr”. A pet dal teme dal control di vicinât – su chel la Prefeture di Pordenon e à preparât un Protocol tra associazions e grups di citadins che al è daûr a spietâ il vie libar dal ministeri dal Interni – l’assessôr al à precisât: “Ancje chest aspiet al è previodût de leç regjonâl; il fenomen dal control di vicinât al è difondût e no si podarès controlâ cence une leç. Vuê – al à dit Roberti – e je stade la domande de bande dal prefet di Pordenon di procedi par regolamentâlu ancjemò miôr e podêlu meti a servizi des Poliziis locâls e di chês altris Fuarcis dal ordin par rivâ a garantî plui sigurece ancje cun chestis formis dissiplinadis di sigurece partecipade che a cjapin i citadins tant che volontaris”. (a.d.g.) – 16.01.2024
