Centridiestre al lavôr par formâ la Zonte regjonâl

Dificil previodi une fumade blancje za al prin incuintri ancje se buine part dal lavôr, cuntune vitorie cussì impuartante, e je stade za fate. Il centridiestre cu la Lista Fedriga, Lega, Fratelli d’Italia e Forza Italia al è daûr a dâsi adun in chestis oris par cirî la cuadre sui puescj in zonte che, cence fal, si intersecaran cul rûl di vicepresident e, soredut, di president dal Consei regjonâl e, di consecuence, cui presidents des comissions. Il scheme di zûc, par doprâ la terminologjie dal balon, al previôt un assessôr par Forza Italia – cu la riconferme probabile di Riccardo Riccardi – e trê par chei altris, ma Fedriga al riclame un numar di vôts impuartant in plui a pet de coalizion e duncje ancje une casele in plui. Il scambi duncje al sarès cu la presidence dal Consei regjonâl, che al puartarès ae rinunzie di un puest in zonte. Sui nons i dubis a son pôcs, dal sigûr di confermâ, ma al sarès di smaraveâsi se Pierpaolo Roberti, Sergio Emidio Bini e Alessia Rosolen no fossin de partide, jessint ducj inte cuote Fedriga; inte Lega ancje Barbara Zilli e pues svantâ numars e un rapuart otim cul president, numars che al podarès fâ pesâ Stefano Zannier a diference di Sebastiano Callari che al podarès jessi sacrificât pe presidence dal Consei di rimeti a Mauro Bordin. In Fratelli d’Italia, vint Fabio Scoccimarro un acuardi cu la Meloni, la cuote colôr di rose e varès di rivâ di Pordenon e duncje no son tantis alternativis se no chê di Cristina Amirante, dopo al è Mario Anzil, che al podarès vê o un assessorât o la vice presidence de aule e in chel câs al sarès pront Stefano Balloch. Pes oposizions invezit al è Francesco Russo dal Pd che al sarès daûr a cirî la riconferme intal rûl di vicepresident dal Consei pes oposizions, intant che Francesco Martines, chel plui votât, al pontares a fâ il cjâf grup. Cheste sere, in ogni câs, il cuadri al sarà dal sigûr plui clâr. (A.D.G.) – 14.04.2023