Concessions balneârs in regjon, Movimento 5 Stelle cuintri la proroghe

“No bastave la proroghe a dut il 2024 che e puartarà sanzions pesantis ai Comuns, cumò al rive ancje il scont su lis concessions balneârs. Une manovre chê de Leghe nazionâl, che e à cjatât une spuinde fuarte in Regjon cul assessôr Sebastiano Callari, che al puartarà in curt a ricors e a consecuencis, che a pesin, multis che a varan di paiâ ducj i citadins. Za si anunziin, di fat, ricors de bande di associazions ambientalistis e a difese dai consumadôrs, che si abataran sui Comuns cuintri la decision, cjapade de Regjon, di sprolungjâ di un altri an lis concessions balneârs. La Regjon si è movude a pro de proroghe fevelant di dams materiâi ae cueste, dams che no dome no son stâts in maniere tâl di ipotizâ un stop ae balneazion, ma che a son stâts za mitûts a puest pe plui part, cussì cemût che al è sucedût intai agns passâts dopo des burascjadis che no àn mai ostacolât lis ativitâts balneârs estivis. Dams che a saressin stâts frontâts in ogni câs di gnûfs concessionaris che a sotentrin”. Cussì il coordenadôr provinciâl dal Movimento 5 Stelle Mauro Capozzella su la proroghe pes concessions balneârs ancje intai Comuns dal litorâl regjonâl. (a.d.g.) – 08.01.2024