A rivin a 5,5 milions di euros i fonts che la Regjon e destinarà ae mont dal Friûl-Vignesie Julie e che cun chei si lavorarà ae sistemazion di cualchi strade forestâl une vore ruvinade e ae realizazion di oparis pe prevenzion dal pericul di dissest idrogjeologjic.
Lu à decidût la Zonte regjonâl aprovant, intal cors de sentade di vuê, une delibare daûr de propueste dal assessôr cun deleghe ae Mont Stefano Zannier. I bêçs a rivin dai Fonts pal disvilup des monts talianis (Fosmit) che, cuntun decret dal Ministri pai Afârs regjonâi e lis autonomiis dai 4 di Avost dal 2023, a son stadis ripartîts aes variis Regjons.
Ae prevenzion dal dissest idrogjeologjic a son stâts destinâts 2,39 milions di euros che cun chescj a son previodûts intervents intai Comuns di Cjistielgnûf (intes localitâts di Gais di Malevana, Celant e Natarù), Clausêt (inte localitât di Celant) e Forgjarie dal Friûl (vie Venier). A son oparis necessariis e che a pressin ancje dopo dai avigniments meteorologjics intens intes zornadis dai 2 e dai 3 di Novembar passât. Lis oparis di manutenzion stradâl e forestâl, che a podaran contâ suntune sume complessive di 3,1 milions di euros, a interessaran invezit i teritoris dai Comuns di Tarvis (viabilitât Coccau-Goriane), Pontebe (localitât Veneziane) e For Davôtri (par ii colegament dal centri abitât di Culine cul ripâr Tolazzi).
“Cun chest finanziament statâl straordenari – al sclarìs l’assessôr Zannier – o din rispueste a altris esigjencis presentadis al assessorât ae Mont; chestis risorsis si zontin a chei impuartants finanziaments regjonâi destinâts in maniere ordenarie ae tutele dal teritori di mont”. (a.d.g.) – 07.12.2023
