“Lis risorsis stanziadis intal belanç regjonâl pal 2023 a pro dal setôr agrialimentâr, itic, des forestis e de mont a rivin a plui di 81 milions di euros. Rilêf particolâr in cheste manovre a assumin chei altris 50 milions pai intervents intal ambit dal Plan strategjic nazionâl de Pac 2023-2027 (Psn Pac) e i 20 pe programazion in sierade. O destinarìn ancje 7 milions in trê agns ai Consorzis di bonifiche e 4 milions al setôr zootecnic par compensâ chei coscj in plui che a derivin dal conflit rus – ucrain”.
Chest il coment dal assessôr regjonâl aes Risorsis agroalimentârs, forestâls, itichis e mont Stefano Zannier su lis puestis risiervadis de leç finanziarie ae Direzion di sô competence.
La manovre di fin dal an e sostignarà ancje lis impresis agriculis e agroalimentârs, cul trasferiment di 14,5 milions di euros al Fonts di rotazion in agriculture, il stanziament di 9,5 milions par oparis di irigazion e manutenzions relativis realizadis dai Consorzis di bonifiche, 4,3 milions di trasferiments al Ersa pe promozion dal agroalimentâr, plui di un milion par servizis di consulence aes aziendis zootecnichis, un milion par contribûts par meti ju arbui e un milion pal Fonts emergjencis in agriculture. (ADG) – 15.12.2022
