E je barufe tra il Pd e Fratelli d’Italia dopo de decision dal Ministeri dai Traspuarts di declassâ l’aeropuart di Roncjis di Monfalcon e cussì ridusi la presince des scuadris dai Vigjii dal fûc che a lavorin pe sigurece.
La decision e je stade contestade dal Pd, che al à anunziât dôs interogazions, une de deputade Debora Serracchiani ai ministris Matteo Piantedosi e Matteo Salvini e une dal cjâf grup in Consei regjonâl Diego Moretti. Par lôr il declassament al puartarà a problemis pe pussibilitât che l’aeropuart al rivi a dâ acet ai svoi dal forest, cun consecuencis ancje pe sigurece.
Daurman e je rivade la rispueste de senatore di Fratelli d’Italia Francesca Tubetti, presidente provinciâl dal partît a Gurize, che e à dit che secont jê nol sarà nissun declassament. (a.d.g.) – 25.02.2025
