Presentât cheste matine inte sede dal Distret sociosanitari di vie San Valentino, a Udin, il progjet di telemedisine che e permet di controlâ a distance e in maniere direte a domicili, il stât di salût des personis cun discompens cardiac. Presints pe ocasion il vicegovernadôr dal Friûl Vignesie Julie cun deleghe ae Salût Riccardo Riccardi, il sindic Pietro Fontanini e il diretôr gjenerâl de Aziende sanitarie universitarie Friûl Centrâl Denis Caporale
“Al è un progjet impuartant e inovatîf – al à afermât Riccardi -, ativât dal Distret sociosanitari di Udin. Al partis cu la volontât di slargjâ chest model di rispueste a dut il teritori regjonâl, par une sanitât simpri plui dongje des personis e pal superament des disavualancis, sociâls e teritoriâls: al è un gnûf model di assistence propit locâl, di prossimitât, che e interven par dâ un servizi essenziâl in mût concret e puntuâl aes nestris comunitâts”.
Al è un sisteme di tele control domiciliâr fat midiant Centrâl operative par cure di miedis di medisine gjenerâl volontaris. La iniziative e je dreçade aes personis che a patissin di discompens cardiac no grâf. “La telemedisine e je realtât za inte zone di mont dal Friûl-Vignesie Julie – al à visât il vicegovernadôr -. Lis areis metropolitanis e chês indulà che e je mancut int de nestre regjon a àn esigjencis e dibisugnis diviersis e, di consecuence, la aplicazion di cheste modalitât di assistence a distance e je tarade par jessi plui zovevul che si pues e risolutive, inte dibisugne zornaliere e cun continuitât”.
I miedis di medisine gjenerâl a àn selezionât i pazients su base volontarie: a chescj ultins a son stâts furnîts i dispositîfs medics pe rilevazion dai parametris fisiologjics individuâts e il tele control al è stât inviât tacant di Dicembar. (A.D.G.) – 16.01.2023
