Il president de Regjon Massimiliano Fedriga, esponent de Lega, al è secont, a pâr cul coleghe de Emilie-Romagne, inte classifiche di gradiment dai Governadôrs, secont un scandai fat di Swg suntun campion di 10.899 personis tra Març e Mai.
A vuidâ la classifiche al è Luca Zaia, ancje lui leghist, president dal Venit, cul 69 par cent dai consens. Inte classifiche dal operât dai presidents di Regjon a van daûr a pâr cul 64 par cent Stefano Bonaccini (dal Partito Democratico), governadôr de Emilie-Romagne e apont Massimiliano Fedriga.
A pet dal 2022, Zaia al à pierdût trê ponts mantignint però la prime posizion, intant che Bonaccini di ponts a ‘nd à pierdûts 7, mantignint il secont puest che al scuen però dividi cun Fedriga, che al à confermât il nivel di gradiment di dodis mês indaûr.
Feraluts di code de classifiche a son Francesco Rocca (Fratelli d’Italia) president de Regjon Lazi cul 30 par cent; Renato Schifani (Forza Italia) governadôr de Sicilie cul 26 par cent e ultin Christian Solinas (centridiestre) president de Regjon Sardegne cul 20 par cent. (A.D.G.) – 26.05.2023
