Il sindic di Cividât Daniela Bernardi e à dât acet inte sale consiliâr dal municipi, miercus ai 8 di Març, ai rapresentants dai Comuns, de associazions di categorie, des ativitâts produtivis e altris protagoniscj impuartants dal teritori par firmâ l’at che al fisse l’acuardi di colaborazion dal Distret dal Cumierç cividin.
In presince dal vice-sindic Roberto Novelli e dal conseîr delegât Manlio Boccolini che al à lât daûr in maniere direte a dutis lis fasis operativis, i sindics dai Comuns des Valadis dal Nadison, Torean, Atimis e Faedis, Confcommercio, Camera di Commercio Pordenone-Udine, Universitât dal Friûl, Museo Archeologico Nazionale, Promoturismo FVG, Civibank, Unione Artigiani-Confartigianato, Coldiretti Udine e Consorzio Tutela Vini Friuli Colli Orientali Ramandolo a àn sotscrit l’at costitutîf dal Distret dal Cumierç. Chest at al è funzionâl ancje ae presentazion de domande di partecipazion al prin bant regjonâl dedicât al rilanç dai centris storics traviers azions miradis e al è condividût tra subiets publics e privâts, cjapant dentri lis ativitâts economichis che a operin a vantaç dai citadins. (A.D.G.) – 10.03.2023
