Il sindic di Sacîl Carlo Spagnol al à anunziât in vie uficiâl i components de gnove Zonte comunâl.
A son simpri siet i assessorâts, assegnâts in maniere juste a oms e feminis, cun gnovis jentradis e ciertis riconfermis, e un bon cambi di deleghis inte maiorance formade di Lega-Sacile Civica, Fratelli d’Italia e Forza Italia-Viva Sacile.
Il sindic di Sacîl Carlo Spagnol si ten par se Belanç e programazion e Personâl, tant che intal mandât di prime. Il gnûf vicesindic al è Marco Bottecchia e al à ancje lis deleghis a Oparis publichis, Programazion viabilitât e manutenzion stradâl. Alberto Gottardo al torne a jessi assessôr par Sport e timp libar, Associazionisim, Comunicazion e Transizion digjitâl, Progjets europeans. Elisa Palù e je assessôr a Urbanistiche e Edilizie privade, Turisim, avigniments e disvilup dal teritori, Ativitâts produtivis. Confermât intal rûl di assessôr Ruggero Spagnol che si interessarà di Culture e avigniments culturâi, Scuele, educazion e formazion, Politichis pai zovins, Pedibus. Intal segn de continuitât ancje Antonela Baldo che e larà indevant a jessi assessôr ae Tutele de salût, Servizis sociâi, disabilitât, integrazion e struturis protetis, Politichis pe famee. Fuart de esperience maduride, Ariana Sabato e starà daûr a Ambient e Manutenzion dal patrimoni (vert, cimitieris, imobii comunâi). Gnove jentrade par Francesco Morabito che al vuidarà Planificazion ativitât economichis e cumierç, Sigurece e Polizie Locâl, Lavôr e ocupazion e Sacîl “Citât sane”. (A.D.G.) – 18.04.2023
