A saran sessante i gnûfs autobus ecologjics di ultime gjenerazion che a jentraran in servizi inte rêt dal Traspuart public locâl dal Friûl-Vignesie Julie tra la fin di chest an e la fin dal 2025. I gnûfs mieçs a saran distribuîts, daûr lis dibisugnis, tra lis cuatri societâts dal Tpl de Regjon che a costituissin il Consorzio Tpl Fvg Scarl, gjestôr dal servizi dal Jugn 2020. L’invistiment par fâ deventâ plui eficiente e moderne la flote regjonâl dai bus al è di 27 milions di euros. I bêçs, za intal belanç regjonâl, a rivin di risorsis Pnrr, fonts europeans complementârs e fonts ministeriâi.
Lu à fat savê l’assessôr regjonâl aes Infrastruturis e teritori, Cristina Amirante, intun incuintri inte sede de Regjon di Pordenon cui vertiçs societaris dal Consorzi Tpl Scarl e des cuatri societâts che a gjestissin il traspuart public locâl intai cuatri teritoris ex provinciâi: Trieste Trasporti, Arriva Udine, Atap Pordenone e Atp Gorizia. (a.d.g.) – 31.08.23
