I piçui comuns de mont no si rindin al carburant cjâr. Il Comun di Claut al è tornât di fat ae cjarie butant une gnove clamade ae Regjon. La domande e je semplice: slargjâ lis agjevolazions previodudis pai residents di fasse 0 ancje pai teritoris de mont, lontans dai grancj centris urbans.
“A nûf mês de nestre comunicazion precedente, restade no scoltade, o tornìn a domandâ la atenzion dal assessôr Scoccimarro viers i paîs de mont furlane”. A dîlu al è il sindic di Claut Gionata Sturam, che al continue a sostignî – adun cun chei altris sindics dal Cjanâl de Ciline – la impuartance di slargjâ ai comuns de mont i sconts previodûts par cui che al è a stâ dongje dal confin di Stât.
“Il passât Otubar – al va indevant il prin citadin – , la Regjon Friûl-Vignesie Julie e veve aprovât la costituzion di une gnove fasse pes agjevolazions sul presit dal carburant: la “fasse zero”. La norme e je stade a pene sprolungjade, ma cuntun peiorament pes fassis 1 e 2 che si son viodudis ridusi di 2 centesims al litri il scont aplicât. Dal 1n di Lui ai 31 di Lui, i sconts massims aplicabii inte Fasse 0 a saran di 37 centesims al litri pe benzine e di 28 centesims al litri pal gasoli. Inte Fasse 1 i sconts a rivaran a un massim di 27 e 18 centesims, intant che inte Fasse 2 a saran di 20 e 14 centesims”.
“Mi pâr cuasi assurt favorî ancjemò di plui cui che jessint a stâ dongje dal confin al à za une alternative, e intant calâ il scont pes altris fassis” al à sclarît Sturam. “O crôt che invezit la politiche regjonâl e varès di cirî di judâ cui che si cjate tant lontan dai centris principâi e al à di passâ tocs di strade tant luncs par rivâ. Al basts pensâ che nus vûl une ore di auto par passâ i 55 chilometris che a separin Claut, comun di Fasse 1 di Pordenon”. (A.D.G.) – 29.06.2023
