“Il ricuart dal esodi dolorôs des tieris che a jerin talianis vuê al aparten, o crôt, a ducj i talians e al è un segn impuartant de nestre comunitât nazionâl viers une storie condividude. Fintremai che la vicende des foibis e la vicende dal esodi no son stadis di dute la comunitât nazionâl, o crôt che no si podès fevelâ di une memorie condividude. Vuê chest mi lasse sperâ intun percors che al va completât, ma che al è za in cors”. Lu à dit il president dal Senât, Ignazio La Russa, vuê in visite ae Foibe di Basovizza, ae vilie dal “Giorno del ricordo”.
La Russa al à lassât jù une corone par memoreâ e onorâ lis vitimis des foibis. Prime de cerimonie si è pleât devant dal Sacrari in segn di rispiet. Dopo al à visitât il centri documentâl dongje che al conte l’esodi istrian, fluman, julian e dalmate e lis vicendis dal confin orientâl. A fâ di vuide ae seconde cjarie dal Stât, di là dal sindic di Triest Roberto Dipiazza, al assessôr regjonâl Fabio Scoccimarro e ai parlamentârs locâi di Fradis di Italie, l’avocat Paulo Sardos Albertini, president de Lega Nazionale, che al à ricuardât lis peraulis di chel che al jere il president de Republiche Francesco Cossiga, che i jere stât disconseât di vignî a Basovizza. (A.D.G.) – 09.02.2023
