Conference tradizionâl di fin dal an pe Zonte Fedriga. E je stade ancje la ocasion par segnâ un belanç di mandât, a pôcs mês dal tiermin de legjislature regjonâl. L’avigniment si è viert cuntun video che al à contât, traviers lis imagjins e lis intervistis al president e ai assessôrs, i cinc agns di guvier, de esperience tant dificile dal Covid ae vuere in Ucraine, passant par chê che je stade la stagjon desolant dai fûcs estîfs.
Daspò al à cjapât la peraule il governadôr Massimiliano Fedriga: “La valorizazion de autonomie e je stât un dai ponts di fonde dal nestri lavôr, pai servizis e lis rispuestis che o podìn dâ ai citadins. Chest nus à permetût di inviâ misuris impuartantis, o pensi a chês a pro des aziendis, cemût che SviluppoImpresa o il scont su la Irap, ma ancje di jessi la Regjon che e à stanziât chei plui ristôrs intal periodi de pandemie e par contrastâ la energjie cjare”.
Fedriga al à, dopo, listât i intervents a pro dai varis setôrs economics e pe atrazion di invistiments. (A.D.G.) – 23.12.2022
