Il Consei regjonâl al à aprovât vuê un intervent presentât dal assessôr aes Autonomiis locâls par anticipâ al Comun di Tierç di Aquilee bêçs par mieç milion di euros, che lis sôs cassis a son vueidis par cause dai ritarts dal Stât tal inviâ il contribût statâl pai lavôrs di ristruturazion di une scuele.
Il Comun, come che al à dit l’assessôr Pierpaolo Roberti, al veve otignût tal 2017 un contribût dal Ministeri; chescj lavôrs a son stâts fats e za paiâts dal municipi, che però nol à ancjemò viodût nancje un centesim de bande dal ministeri de Istruzion.
E cussì, par dâ une man a risolvi la fuarte crisi finanziarie dal municipi, la Regjon e à anticipât 500 mil euros che il Comun al tornarà indaûr daurman cuant che a rivaran i bêçs di Rome. (a.d.g.) – 30.04.2024
