In 400 a Rome dal Friûl-Vignesie Julie par manifestâ a difese de Sanitât

A saran 400 i lavoradôrs e i pensionâts dal Friûl-Vignesie Julie che a rivaran a Rome pe manifestazion in difese de sanitât publiche convocade de Cgil nazionâl par sabide ai 24 di Jugn. Corieris a son in partence tra chest dopomisdì e usgnot di dutis lis provinciis de regjon, ma part dai manifestants e rivarà inte capitâl in tren. La Cgil dal Friûl-Vignesie Julie e rive al apontament su la code di une lungje serie di mobilitazions in ducj i teritoris, ultime in ordin di timp chê convocade de Funzion publiche di Udin, che vuê e conclût a Tumieç e Glemone il so tour di presidis intai siet ospedâi de provincie. (A.D.G.) – 23.06.2023