Plui sveltece intes proceduris des indenizazions e, tal stes timp, miorament de fase di perizie di stime dai dams.
La II Comission consiliâr cun a cjâf Alberto Budai (Lega), dade adun a Triest inte aule consiliâr, e à dât parê favorevul a maiorance (astignûts Mauro Capozzella dal M5S e Furio Honsell di Open Sinistra Fvg) ae deliberazion de Zonte regjonâl che e modifiche il regolament sui criteris e lis modalitâts pe indenizazion dai dams causâts de faune salvadie ae agriculture, al patrimoni zootecnic, aes oparis sui terens coltivâts e a passon, ai veicui, e ancje pe concession di contribûts pe conservazion e la valorizazion di bressane e rocui.
Aprovât in vie preliminâr dal Esecutîf, il proviodiment al intint “rivisitâ intal complès un regolament – al à sclarît l’assessôr regjonâl a Risorsis agroalimentârs, forestâls, itichis e mont, Stefano Zannier – che al veve bisugn di manutenzion. Il sisteme relatîf ai dams provocâts de faune si base sul principi che la proprietât dai animâi salvadis e je dal Stât, ma e ven gjestide de Aministrazion regjonâl che e interven cu lis indenizazions, robe diferent rispiet ai risarciments”. (ADG) – 5.12.2022
