Presentadis in Consei regjonâl dal president de Regjon Friûl-Vignesie Julie, Massimiliano Fedriga, lis liniis programatichis de gnove Zonte regjonâl.
“Ae gnove Zonte o ai domandât di lâ indevant cul concet di scuadre pal ben coletîf”, al à anticipât ai microfons di Telefriuli Fedriga, cualchi istant prime dal principi de riunion dal Consei.
A Telefriuli Fedriga al à anticipât ancje lis peraulis clâf dal discors programatic, scomençant de continuitât cui cinc agns de prime Zonte. Altris pilastris dal discors a son i invistiments, la proiezion e l’atrat internazionâl de regjon, la colaborazion cul Guvier nazionâl, l’impegn sui temis de sanitât, de ocupazion e dal disvilup economic. “Serietât e veretât a son i cancars par recuperâ un rapuart fuart fra citadins e istituzions” al à anticipât ancjemò Fedriga.
“Intes dificoltâts resintis – al à dit il president intal discors di insediament – e à vût mût di tornâsi a afermâ la capacitât straordenarie des feminis e dai oms dal Friûl-Vignesie Julie di rispuindi cun compatece e definizion aes sfidis plui complessis. Cemût che intal 1976, la resilience e il spirt solidaristic a àn permetût di mantignî vive, intai moments di plui inciertece dovûts ae pandemie, la sperance. Un spirt che si è esprimût ancje acetant i dispatriâts in fuide de vuere in Ucraine”.
“La legjislature prossime – al à visât Fedriga – e sarà decisive stant che e rapresente l’orizont atuatîf dal Pnrr, une partide che in Friûl-Vignesie Julie e vâl cuasi doi miliarts di euros: une sfide complesse che e sugjerìs la oportunitât pes Regjons di assumi un rûl atîf di colegament e racuardi di aree largje. Cetant che aes progjetualitâts specifichis, no pues no citâ la Val dal idrogjen dal Nord Adriatic”.
Cjalant al futûr il governadôr al à rimarcât la dibisugne di “creâ lis cundizions par fâ dal Friûl-Vignesie Julie une tiere simpri plui trative par gnûfs invistidôrs e pai zovins. Il slizeriment de pression fiscâl al è in chest sens la prime rispueste che o vin volût dâ, ma o vin potenziât ancje il rûl de Agjenzie Lavoro&SviluppoImpresa e triplicât i invistiments forescj”. (A.D.G.) – 02.05.2023
