La politiche regjonâl e vai Isidoro Gottardo, muart ae etât di 71 agns dopo une lungje malatie.
La sô lungje cariere politiche e jere tacade te metât dai Agns ’70 cuant che al jere jentrât te Democrazie Cristiane, dentri dal Consei comunâl di Sacîl, la sô citât, indulà che dopo al varès fat il sindic dal 1985 al 1993. Dopo di chê esperience il salt sui bancs dal Consei regjonâl dentri dal Partît popolâr, cuant che al veve ancje fat l’assessôr regjonâl ae Agriculture. Tal 2003 al jere stât rielet in Consei regjonâl par deventâ cjâf grup di Forza Italia.
Tal 2008 al jere stât elet come deputât dentri dal Popolo delle libertà inte decime seste legjislature, par dopo lâ dentri dal Nuovo Centrodestra di Angelino Alfano. Al lasse i fîs Angela e Alberto, vuê assessôr dal Comun di Sacîl. (a.d.g.) – 25.03.2025
