La ricercje sui Museus e sui lûcs de culture de Regjon Friûl-Vignesie Julie e je stade analizade vuê de Cuinte comission dal Consei regjonâl. Dal document a saltin fûr robis buinis e altris indulà che al è un ciert ritart, ma si trate di un strument, come che al à dit Mario Anzil, assessôr regjonâl ae Culture, util par programâ un plan strategjic. Di une bande al salte fûr che a son stâts aumentâts di mieç milion di euros i bêçs a pro dai museus di interès regjonâl par un totâl di 16,4 milions di invistiments, dome tal 2023.
Une buine percentuâl di struturis a àn cumò a disposizion lis proceduris pe catalogazion, l’abatiment des barieris architetonichis e il fat che la ativitât e sedi fate in maniere regolâr. A son ancjemò problemis invezit se si fevele di catalogazion, digjitalizazion e otimizazion dal personâl e cussì struments inzornâts pe acessibilitât e pai programs di inclusion. Mâl invezit se si fevele de Rêt: dome un museu su cinc al à une conession vierte al public e dome il 20% al da la pussibilitât di comprâ i biliets doprant Internet. (a.d.g.) – 18.03.2025
