“Al è dal mandât dal assessôr Pizzimenti che o spietìn di viodi clâr su la Çumpiel-Glemone. Dutis cence rispueste lis domandis di verificâ la progjetazion dal colegament stradâl. Cul assessôr Amirante la musiche e je la stesse”. Al è il coment dal cjâf grup dal Patto per l’Autonomia-Civica Fvg, Massimo Moretuzzo, ae serie di declarazions e notiziis sul pussibil progjet de opare che a continuin a corisi daûr su la stampe.
“Che l’assessôr Amirante e vegni in aule a ilustrâ il progjet, parcè che al è palês, des ultimis notiziis di stampe, che un progjet al è – al zonte il conseîr Marco Putto, firmatari di une domande di audizion su cheste tematiche deponude ancjemò ai 27 di Lui dal 2023-. Che e sclarissi in mût clâr i intindiments de Zonte a pet di une opare che e podarès vê un impat economic e ambientâl tant impuartant par tancj Comuns de nestre regjon”.
“Za l’assessôr Pizzimenti al veve declarât che il studi di fatibilitât al jere stât completât – al va indevant Moretuzzo -, par po scuvierzi, dopo di une nestre domande di acès ai ats, che nol jere vêr. Di mês o scoltìn declarazions contraditoriis ancje de bande dal assessôr Amirante: prime e aferme che nol è un progjet definitîf de strade, ma la stampe e publiche il percors; dopo o vignìn a cognossince di un incuintri a Riul di Osôf cui vertiçs de Fantoni che dulinvie Amirante e acuisìs, cemût che e dîs une note de Regjon, “un pont di viste impuartant sui pussibii futûrs disvilups dal sisteme logjistic regjonâl” e e anunzie l’intindiment di inviâ la progjetazion de Çumpiel-Glemone dentri dal 2024. E je notizie di vuê che a Fevrâr a partiran i incuintris sul teritori par ilustrâ il gnûf as viari a citadinis e a citadins, e il Consei regjonâl nol sa nuie. No si è mai rispuindût aes domandis di audizions e sclariments di sede di IV Comission, chê competente par materie. Parcè l’assessôr ancjemò no aie ritignût di fevelâ? Parcè no aie acuisît ancjemò il pont di viste dal Consei regjonâl e des comunitâts dal teritori, ma dome chel dai puartadôrs di interès economics? Al sta mancjant dal dut un confront seri e trasparent, un pont impressindibil cuant che si progjetin infrastruturis cussì significativis”, a concludin Moretuzzo e Putto. (a.d.g.) – 12.01.2024
