Aquilee e 500 dai siei abitants a domandin scolte e a disin No ae gnove strade Bretella Est par Çarvignan. A rapresentâju devant dal president dal Consei regjonâl, Piero Mauro Zanin, e ai cjâfs grup Mauro Bordin (Lega), Diego Moretti (Pd), Franco Mattiussi (FI), Massimo Moretuzzo (Pat pe Autonomie), Furio Honsell (Open Sinistra Fvg) e al conseîr Cristian Sergo (M5S), une delegazion dal Comitât Aquilee Bens comuns, coordenade di Lodovico Nevio Puntin, par 20 agns sindic de citadute udinese.
Intal 2011, cu la aprovazion di une variante tal Plan regoladôr (Prgc) de bande dal Consei comunâl, al jere stât ipotizât un percors par colegâ la strade regjonâl 352, a Sud dal paîs, aes provinciâls 26 e 8, dongje de aziende agricule Tarlao, par dopo lâ indevant viers Vile Visentine e il Comun di Rude.
“Vuê – a àn afermât Puntin e chei altris rapresentants dal Comitât Aquilee Bens comuns – si fevele di un gnûf progjet elaborât di FVG Strade par creâ un colegament tra Çarvignan e la zone meridionâl di Aquilee, coventant duncje di une gnove variante al Prgc e produsint la pierdite ireversibile di centenârs di etars di teren agricul, in contrast net cu lis diretivis europeanis cuintri il consum di teren. Ciertis des nestris aziendis a varessin i terens taiâts in doi; o vin pôre che a sedi une operazion che e fasarà dams a ciertis realtâts economichis par judâ altris, cjapade dentri une speculazion edilizie pussibile leade a une gnove urbanizazion”.
Soredut, i intervignûts a àn evidenziât che il progjet nol metares a puest i problemis di trafic de Sr352; par di plui se al principi si fevelave di une spese tor dai 8 milions di euros, vuê si tocjin i 30, chê che cuviertidure finanziarie e sarès a cjame de Regjon, ancje traviers l’impiament di un mut che al costituirès un indebitament a cjame de coletivitât. (A.D.G.) – 26.01.2023
