Intal Parlament European si nase un aiar gnûf. Lis decisions cjapadis tai ultins dîs par lis Indicazions Gjeografichis e pai motôrs Euro 7 a van inte direzion simpri pontade dal grup Lega Salvini Premier – Identità e Democrazia.
Se une cisile no fâs la Vierte, dôs forsit a fasin pensâ che une gnove stagjon si è screade tal Parlament European. In plui di un câs, vâl a dî, lis discussions si son sieradis inte direzion che la parlamentarie furlane Elena Lizzi e il so grup, LegaSalvini Premier – Identità e Democrazia, a àn simpri mantignût. E a pierdi, par fortune, e je la ideologjie puartade indenant dai partîts di Çampe, cun ancje il Partito Democratico talian, che a vuelin difindi l’ambient cence tignî cont dai citadins, dal lôr lavôr e dal lôr dibisugn.
“Il vôt adun dal centridrete tal Parlament European al à parât vie il strabalç des fuarcis di çampe sui Euro 7 e cussì dant conferme des posizions za vignudis fûr de Comission Ambient – e spieghe Lizzi -. O sin cussì rivâts a scjampâ il risi che al varès butât a tiere dut il setôr dal traspuart su camion. Si voleve meti in pîts dute une schirie di regulis su carburants, gomis e cetant altri che no fasevin altri se no meti fûr marcjât lis impresis, soredut chês piçulis”.
Un altri esempli di cemût che il sintiment par leçs che a tignedin cont dai citadins europeans al sta tornant ancje a Bruxelles e a Strasburc, al jere vignût fûr dome cualchi zornade prime. I ‘triloghi’ (ven a stâi i confronts tra Comission, Consei e Parlament) rivuart a lis Indicazions Gjeografichis a àn cjapade la strade juste par difindi i produtôrs furlans: nol podarà plui jessi permetût di viodi ator prosec cravuat o asêt balsamic sloven. In plui si ponte a difindi plui e miôr i prodots di chenti de piratarie che e continue a cressi sul marcjât globâl.
“Vie di chestis dôs discussions, une vore impuartantis ancje pai citadins furlans – e va indenant Lizzi – o vin podût viodi madurî une gnove maiorance intal Parlament. Sperìn che cul nestri lavôr ancje un biel toc dai partîts, soredut di centri, si sedin acuarzûts che i europeans a domandin di jessi guviernâts cun bon sintiment e no cun ideologjiis che, ae fin, a van cuintri i lôr interès. Sperìn cussì che e sedi metude tal scansel la ‘aleance Ursula’ che tancj dams e à fat tai ultins agns. Sperìn che, cjalant indenant aes elezions de Vierte dal an che al ven, une gnove maiorance e podedi nassi e cressi fuarte”.
(Informazion par cure dal grup “Identità e democrazia – Lega Salvini Premier”) – 27.11.2023
