E je polemiche cuintri il vie libare dât de Regjon al gnûf implant fotovoltaic su terens agricui a Sante Marie la Lungje.
Une vore dure la posizion dal Conseîr regjonâl di Open Sinistra Fvg Furio Honsell: “Al è un scandul che il gnûf implant fotovoltaic a Sante Marie la Lungje – al à dit Honsell – al ledi indenant cun dut che il sindic di chest Comun al à dât parê contrari ae costruzion di une opare che e ruvinarà i terens. O vin desenis di chilometris cuadrâts di areis industriâls e militârs vueidis che a varessin di jessi metudis a puest e invezit ce fasie la Regjon? E autorize un implant fotovoltaic su 17 etars di teren par fâ un plasê ai parons de energjie. E cun dut che in Consei regjonâl l’assessôr al Ambient Fabio Scoccimarro nus veve sigurât che no saressin plui stadis dadis autorizazions”. (a.d.g.) – 03.09.2024
