Presentât il bant di dîs milions par judâ la int a sigurâ la cjase cuintri dal brut timp

Il president de Regjon Friûl-Vignesie Julie Massimiliano Fedriga al à presentât vuê in maniere uficiâl, adun cul assessôr al Patrimoni Sebastiano Callari, il gnûf bant pe concession di incentîfs pe assicurazion pai dams su lis cjasis su la fonde de leç regjonâl 16 dal 2023.

“O vin di ringraciâ il Consei regjonâl e i cjâfs grup – al à dit Fedriga – che a àn promovût cheste iniziative za tal an passât. Il Friûl-Vignesie Julie al à tacât a lavorâ di timp. Il bant de Regjon par judâ la int a fâ une assicurazion pes cjasis al metarà a disposizion dîs milions di euros e o speri che cheste iniziative e judi la int a prudelâsi intun moment indulà che i events climatics dramatics a deventin simpri plui frecuents”. (a.d.g.) – 23.10.2024