Il Governadôr Massimiliano Fedriga al domande ae Prime ministre un incuintri cu lis Regjons par frontâ la cuistion des riformis istituzionâls.
“Esprimint sodisfazion pal inviament des riflessions su la tematiche – al scrîf il President de Conference des Regjons Fedriga intune letare indreçade al president dal Consei, Giorgia Meloni – o desideri rapresentâi fint di daurman la volontât des Regjons e des Provinciis autonomis di contribuî in mût propositîf a chest percors e, si che duncje, a son a domandâi un incuintri cu la Conference”.
“Intai ultins agns, la soreposizion di intervents normatîfs no simpri coordenâts, adun cu lis mancjadis aprovazions dai dissens di leç di riforme costituzionâl, a àn gjenerât impuartantis criticitâts soredut intal ambit de aministrazion teritoriâl”, al à zontât Fedriga, secont che “pal sisteme des Regjons al è di timp avertide la esigjence di condividi percors indreçâts a passâ lis criticitâts”. (A.D.G.) – 08.05.2023
