Une mobilitazion costante e cressinte viers dal Guvier nazionâl, par otignî prime di dut une riforme dal fisc, buine di colpî la evasion e di tutelâ i redits dai pensionâts, che a son chei che plui a pain tassis a paritât di redit e si son viodûts taiâ la rivalutazion dai assegns.
A chest si zontarà ancje une azion decise viers de Zonte Fedriga, che “pûr disponint di risorsis zontadis straordenariis no à savût programâ un dissen strategjic di cressite socioeconomiche de regjon”. A son chescj i obietîfs che si prefisse il Sindicât pensionâts Cgil dal Friûl-Vignesie Julie, sigûr ancje de dibisugne di un cambi radicâl di rote sul front des politichis sanitariis. A dîlu Roberto Treu, confermât a largje maiorance (78% di favorevulis) intal rûl di segretari gjenerâl, ae fin dal congrès regjonâl che si è tignût îr a Çarvignan. (A.D.G.) – 24.01.2023
