Prime sì, dopo no, cumò viodìn. La struture di prime jentrade pai migrants, che e pareve la prioritât di Guvier e Regjon a principi 2023, e jere stade archiviade za dal ministri dai Internis Matteo Piantedosi dilunc dal incuintri cun Slovenie e Cravuazie ai 2 di Novembar passâts. Dopo l’argoment al è sparît des discussions ae fin dal an. L’assessôr regjonâl ae Sigurece Pierpaolo Roberti al conferme però che la ipotesi no je stade dal dut archiviade.
Simpri l’assessôr al conferme che i controi ai confins a àn dât risultâts impuartants e, viodude la crisi internazionâl, al covente lâ indevant. Intant il segretari provinciâl di Triest dal Sap, Lorenzo Tamaro, al conferme la eficacitât dai controi e al domande che al sedi un aument permanent dal personâl pe frontiere e l’ufici imigrazion, cu la revision de logjistiche viodude la masse di lavôr pal compart. (a.d.g.) – 17.01.2024
