Sophie Mangutsch e je la vincidore de borse di studi par un dotorât di ricercje in Linguistiche, promovût de Libare Universitât di Bolzan e de Agjenzie regjonâl pe lenghe furlane (ARLeF), in cooperazion cu la Universitât di Verone. Il titul de borse al è “Analisi comparade des misuris di tutele de lenghe rumance grisonese, ladine brissinotirolese e furlane”. La aree tematiche e je chê de sociolinguistiche, cuntun interès particolâr pe tutele juridiche e pes politichis linguistichis publichis che a tocjin lis trê lenghis di minorance cjapadis in esam dal progjet: il rumanç dai Grisons, il ladin dolomitic e il furlan. Il cors di dotorât si disviluparà tai trê agns academics 2024/25 – 2026/27 e al cjaparà dentri une ativitât specifiche di ricercje che Sophie Mangutsch e fasarà te Agjenzie regjonâl pe lenghe furlane, par almancul doi mês. La gnove uficiâl e je stade pandude intant di une conference stampe te sede di Udin de Regjon Autonome Friûl-Vignesie Julie, ae presince dal assessôr regjonâl aes Autonomiis locâls, Pierpaolo Roberti, dal president de ARLeF, Eros Cisilino, e di Paul Videsott, professôr ordenari di Filologjie romaniche, diretôr de Sezion ladine de Libare Universitât di Bolzan e responsabil sientific dal Istitût Sudtirolês dai Grups Etnics (SVI). “Un studi cussì – chest il coment dal assessôr Roberti – nol è mai stât fat prime e al è un invistiment une vore impuartant pe Regjon”. Ancje parcè che, daûr dal president Cisilino, “il numar di chei che a vuelin imparâ il furlan e che no lu cognossin al è in incressite, si che duncje cognossi la lenghe dal puest là che si è a stâ al è ancje un ricognossiment de identitât, soredut cuant che la domande e je une sburtade dal bas”. (A.I.) – 29.01.2025
35
