Une cunvigne a Cividât a 50 agns de muart di Guglielmo Pelizzo

Sindic di Cividât par passe vincj agns, dal 1951 e fint ae sô muart. Senatôr de Republiche dal 1953, par cinc legjislaturis une daûr di chê altre. President par undis agns, dal 1964, de Filologjiche. Avocat, om di guvier e aministradôr, simpri atent a economie e culture. Simbul dal mont catolic in politiche. Promotôr de nassite des Frecis tricolôrs. Sostignidôr de viertidure dai confins bande di chê che vuê e je la Slovenie, cuant che nissun i crodeve. Muart ai 6 di Otubar dal 1974, Guglielmo Pelizzo al jere nassût a Faedis ai 25 di Avrîl dal 1904, sest di dodis fîs di Giovanni (za sindic dal paîs) e di Ernesta De Luca. Un dai oms di ponte de Democrazie Cristiane in Friûl, il simbul stes de citât di Cividât, tornade a nassi in graciis dai siei lavôrs: lis scuelis, il teatri e l’ospizi tirâts su’, la nassite dal acuedot dal Poiana, vuidât par vincj agns, la ristruturazion dal ospedâl… La citât, là che al veve viert ancje il studi di professionist e si jere maridât, no lu à dismenteât: intun cu la Filologjiche, e inmanee par joibe ai 10 une cunvigne, “Guglielmo Pelizzo. Cividalese al servizio del Friuli”, te sale dal consei dal palaç dal Municipi, cui intervents di Roberto Tirelli e Enrico Cernigoi, che a contaran, a cincuante agns de muart, dut ce che al à fat e dut ce che al è stât. (A.I.) – 09.10.2024