La Zonte regjonâl e à aprovât vuê lis variazions di belanç, che a previodin intervents che a pontin in particolâr sui invistiments inovatîfs tant che la Val dal idrogjen e sui setôrs strategjics dal F-Vj. “La manovre finanziarie e introdusarà intal sisteme regjonâl risorsis par 652 milions di euros dant rispuestis impuartantis al disvilup e al benstâ dai citadins – e à sclarît l’assessôr regjonâl aes Financis Barbara Zilli -. Tra i intervents si met une novitât che e rivuarde la salût dai anzians cul progjet de domotiche che par chel a son previodudis risorsis par 2 milions di euros. Tra chês altris vôs de manovre, il finanziament zontât pal progjet transfrontalîr de Val dal idrogjen cun 10 milions di euros, intant che simpri sul teme ambientâl de transizion ecologjiche viers l’idrogjen a son previodûts 14 milions di euros pes impresis. Altris intervents de variazion di belanç a rivuardin i interpuarts regjonâi par oparis daurman cantierabilis finalizadis a une miôr funzionalitât de logjistiche, cun di plui par chel che al rivuarde la culture e ven sostignude la candidature di Pordenon capitâl taliane de culture 2027. Pal sport, infin, al è previodût un finanziament pe organizazion dai Campionâts mondiâi di softball dal 2024 che si tignaran in Friûl-Vignesie Julie. Di segnalâ ancjemò, cemût che al à evidenziât l’assessôr, i 15 milions di euros destinâts al aument di capitâl di Insiel pe realizazion di un dade center.
Intal detai des competencis des direzions de Aministrazion regjonâl i 652 milions a vegnin ripartîts cussì: 44 milions aes ativitâts produtivis e turisim; 46 milions aes risorsis agroalimentârs forestâls e itichis; 33,41 milions ae difese dal ambient; 44,90 milions a infrastruturis e teritori; 9,48 milions a culture e sport; 20,36 milions a lavôr, formazion, istruzion, ricercje, universitât e famee; 9,01 milions ae protezion civîl; 115 milions a salût, politichis sociâls e disabilitât; 0,18 milions a autonomiis locâls, funzion publiche, sigurece e imigrazion; 144,46 milions a patrimoni, demani, servizis gjenerâi e sistemis informatîfs; 185,67 milions aes financis. (A.D.G.) – 12.06.2023
