A son dîs i assessôrs de Zonte De Toni, presentade vuê a Palaç di Aronco a Udin. Cinc oms e cinc feminis, cu la volontât esplicite – detade dal gnûf prin citadin – di rispietâ il risultât des urnis. Cuatri assessôrs a vegnin dal Partît Democratic, doi di Spazi Udin, doi de Liste De Toni, un di Aleance Verts-Çampe e un dal Tierç Pôl. Il sindic al à mantignût par se lis deleghis a Belanç, Control di Gjestion, Personâl, Aziendis e Societâts Partecipadis e Grandis Oparis.
Alessandro Venanzi al è vicesindic cun deleghe a Turisim, Cumierç, Polizie Locâl, Pnrr e grancj avigniments; Stefano Gasparin si interessarà di Salût e Ecuitât sociâl; Eleonora Meloni di Ambient e Energjie; Rosi Toffano di Partecipazion, Associazionisim e Sigurece Partecipade. Chescj i cuatri assessôrs dal Partît democratic. De Liste De Toni a fasin part Federico Pirone che si interessarà di Istruzion, Universitât e Culture e Gea Arcella che i son stâts rimetudis lis deleghis par Smart City, Inovazion, Patrimoni e Tribûts.
Doi i assessôrs di Spazio Udine: Ivan Marchiol che i van Mobilitât, Lavôrs Publics e Vert Public e Chiara Dazzan che e starà daûr a Sport e Timp Libar. Arianna Facchini (Aleance Verts-Çampe) e starà daûr a Zovins e Pâr Oportunitâts, intant che Andrea Zini (Tierç Pôl) si interessarà di Planificazion Teritoriâl e Edilizie Privade. (A.D.G.) – 28.04.2023
