Si è viert cuntun minût di cidin par Giulia Cecchettin, la zovine di vincjedoi agns cjatade muarte a Barcis, il comitât provinciâl di Udin di Fratelli d’Italia. Un minût di cidin domandât dal coordenadôr regjonâl e president de Comission Lavôr ae Cjamare dai Deputâts Walter Rizzetto, prime di cjapâ la peraule e presentâ lis liniis programatichis.
Presints i assessôrs regjonâi di FdI Fabio Scoccimarro e Mario Anzil e i conseîrs regjonâi “aleâts” Novelli e Di Bert, a puartâ il salût des fuarcis politichis rispetivis, insiemi a Graziano Bosello de Lega.
Un sôl candidât, Giovanni Candotto, conseîr comunâl a Çarvignan, cuntune militance tant lungje intal partît di Giorgia Meloni e che al à za frontât la prove dai bossui. Fratelli d’Italia, aes passadis regjonâls in provincie di Udin, al à tirât il 17,46%, daûr dome de Leghe, tirade dal vicepresident regjonâl Anzil. Pesante invezit la disfate aes comunâls a Udin, pûr risultant il partît plui votât dal centridiestre. Cumò Candotto al varà il compit di pontâ aes aministrativis de Vierte, cuant che a laran al vôt cent e tredis comuns. (a.d.g.) – 20.11.2023
