Plui di cualchidun, intai mês passâts, al veve butât l’alarme sul fat che lis nestris campagnis a saressin stadis cuviertis in curt di grandis distesis di panei fotovoltaics par opare dai grancj grups impegnâts inte produzion di energjie, sacrificant cussì lis culturis.
Par ce che al somee al veve reson. Al è di vuê il comunicât là che il Grup A2A, che inte nestre regjon za al gjestìs cierts grancj implants idroeletrics, al à anunziât la acuisizion des cuotis di maiorance, midiant une sô societât controlade, de societât che e à otignût la autorizazion pe costruzion e l’esercizi di un implant fotovoltaic intai Comuns di Sante Marie la Lungje e Pavie, clamât progjet “Sant Stiefin”.
“Terminade la realizazion, la infrastruture – cemût che si lei intal comunicât – al varà une capacitât instalade di 59,1 MWp e al produsarà plui di 85 GWh al an, sodisfant il bisugn di energjie eletriche di passe 30 mil fameis. L’implant al consintarà di ridusi il consum di gas naturâl anuâl di plui o mancul 16 milions di metris cubis e al evitarà la emission di plui o mancul 36 mil toneladis di CO2, contribuint a favorî il percors bande la transizion energjetiche dal Paîs. Il completament de operazion, pussibile ancje in graciis de colaborazion laboriose cun ents e istituzions dal teritori, al è previodût dentri dal prin semestri 2023”. (A.D.G.) – 23.12.2022
