Barufe tra minôrs forescj no acompagnâts intal cuartîr udinês di S. Domeni. Îr di sere, tor lis 6, sîs fantats ospits de Cjase de Imaculade si son frontâts pôc fûr de struture di acet, cualchidun impugnant ramaçs crevâts. Lis ostilitâts no son duradis tant. In vie Chisimaio a son rivadis patuliis dai carabinîrs de Compagnie di Udin e de polizie in supuart, cuant che i fantats, di nazionalitât tunisine, egjiziane e pakistane, a jerin za tornâts dentri. Sul puest a son rivadis ancje dôs ambulancis. I sanitaris a àn socorût i minôrs restâts ferîts e ju àn puartâts in pront socors par aciertaments. I zovins, però, no àn volût fâsi curâ e pôc dopo a son tornâts inte struture.
Il clime inte Cjase de Imaculade al jere impiât za di cualchi dì. Cualchi sere prime, di fat, i residents inte zone a àn notât cierts ospits frontâsi intal plaçâl interni de struture di acet.
I sîs fantats coinvolts intes violencis di îr a saran segnalâts ae Procure de Republiche dal Tribunâl pai minôrs di Triest pal reât di barufe. (a.d.g) – 12.12.2023
