A son partîts infin dal TriesteAirport cheste matine aes 9 e un cuart dopo une spiete di plui o mancul 13 oris i 155 passizîrs dal svol Ryanair FR0169 diret a Londre, previodût in origjin aes 8 e mieze di îr di sere.
Un intart che i passizîrs a definissin “une vergogne” dovût, cemût che al sclarìs il diretôr dal TriesteAirport Marco Consalvo, a une serie di concausis sfortunadis: “L’avion che al veve di imbarcjâ i passizîrs – al sclarìs Consalvo – al è rivât di Londre in intart clamorôs, dome a miezegnot e 20, e prime di rivâ a tiere al è stât colpît di un fulmin. In chescj câs al covente par motîfs di sigurece une ispezion al velivul, ma par fâlu al è stât necessari clamâ dai tecnics Ryanair de stazion di Vignesie. Une volte rivâts al TriesteAirport a àn fat lis verifichis, conclududis aes 3 e 20 di gnot, cuant che l’aeroplan al jere pront par partî, ma a chel pont l’ecuipaç al veve passât l’orari di lavôr e, ancje in chest câs par resons di sigurece, nol podeve imbarcjâsi. Al è stât clamât cussì un gnûf ecuipaç di altris aeropuarts, e une volte rivât al TriesteAirport al è stât pussibil fâ jevâ sù il velivul viers Londre. Dilunc des oris di spiete o vin furnît aghe ai passizîrs; magari cussì no di gnot il ristorant al siere, ma o vin furnît la assistence necessarie vierzint ancje la sale conferencis par fâ polsâ miôr pussibil i ospits. Al displâs – al va indevant Consalvo – pai discomuts, ma in chest câs o pues dî che no sedin stâts erôrs de bande di nissun, dome che une serie di avigniments a cjadene tant sfortunâts”.
Furiôs i passizîrs. Emanuela Veninata e conte la gnot di brut sium: “A son cun nô une ventine di fruts, e ancjetancj anzians, di là di cualchi persone disabile. E je une vergogne ce che al è sucedût. Jo o soi Fvj? No cussì. Il 60% dai passizîrs al è forest, si è tratât di une publicitât teribile pe regjon, a àn decidût che no tornaran. Nol jere nancje il servizi di pront socors intal câs cualchidun si sintìs mâl. Nus àn dât dai voucher di 16 euros che o vin podût spindi dome intun piçul bar, nol jere altri”. (a.d.g.) – 25.08.2023
