Auto fûr strade e va jù par une scarpade par trente metris a Taipane

Il vuidadôr al à pierdût il control de sô auto e al è lât fûr strade lant jù par une scarpade par plui di trente metris. Al è sucedût a Taipane tor des dîs di vuê di matine, dilunc de strade provinciâl 38.

 I Vigjii dal fûc dal distacament di Glemone, adun cu la scuadre Saf (Speleo alpin fluviâl) de sede centrâl dal comant di Udin e cul elicotar dal Repart di svol rivât di Vignesie, a son intervignûts daurman, adun cul personâl sanitari e cui tecnics dal Socors alpin, par tirâ fûr de machine l’autist ferît e puartâlu fin li de strade, indulà che a spietâlu e jere pronte une ambulance che lu à puartât tal ospedâl. Daspò i pompîrs a àn metût in sigurece la machine. (a.d.g.) – 04.12.2024