Dentri di un autoarticolât che al rivave dal confin italoaustriac di Tarvis, e je stade scuvierte de Vuardie di finance di Trevîs une des cjamis plui gruessis di spagnolets di cuintribant mai fermâts su strade. Il fer dal mieç pesant al è sucedût aes dôs di gnot dongje dal casel autostradâl di Vignesie Est. De viertidure dai portelons posteriôrs e dal têl laterâl dal tir, il prin “strât” di marcjanzie al jere costituît di legnam destinât in Pulie. Platadis daûr a panei di faiâr, lis Flamis zalis a àn cjatât trê toneladis di spagnolets dividudis in 14.400 stechis cul bol “Rothmans Blue”.
I tabacs secuestrâts, dal valôr comerciâl di plui o mancul 720 mil euros, no di podê comerciâ in Italie e inte Union europeane, parcè che no conformis ai parametris minims di sigurece previodûts de normative comunitarie, a jerin destinâts a jessi vendûts al detai cence nissune autorizazion e in evasion di impueste, cuantificade in plui o mancul 575 mil euros.
I doi conducents dal mieç a son stâts arestâts pal reât di cuintribant ingriviât di tabacs lavorâts forescj. Secuestrâts i 6 bancâi di spagnolets, insiemi al camion doprât pal traspuart. (a.d.g.) – 13.12.2023
