Al è stât blocât l’om che si pense al vedi trat a Vladimir Topjana, l’om di 43 agns di nazionalitât albanese copât îr sere cun colps di pistole dopo di une barufe fûr di un bar.
L’agressôr al sarès l’albanês Roger Shota di 34 agns, che al jere ae vuide de sô auto doprade par scjampâ subit dopo dal fat, e al è stât cjapât tra Sacîl e il confin cul Venit, pocjis oris dopo dal omicidi.
Al somee che la vitime, un autist che al viveve a Cormons e pari di famee, intant che al jere in compagnie di un parint, al vedi incrosât Shota e so pari Pren che a jerin rivâts cu la auto, dopo blocade dai carabinîrs dongje Sacîl. Par cualchi motîf e je tacade une barufe pardabon violente. A un ciert pont un dai doi de auto al à tirât fûr une pistole tirant doi o trê colps che a àn cjapât la vitime al cjâf, tant che al è muart sul colp.
I carabinîrs rivâts sul puest a àn tacât daurman lis investigazions tirant dongje testemoneancis impuartantis de int che si cjatave in chel moment fûr dal locâl. Subit dopo lis ricercjis e la cature dai doi oms che a saran interogâts par sclarî il parcè dal omicidi. (a.d.g.) – 07.04.2025
