Pe muart di Lorenzo Parelli, il zovin student vitime di un infortuni sul lavôr te Burimec di Lauçac ai 21 di Zenâr dal 2021, a son stadis decidudis condanis par 8 agns di preson.
Al è finît cussì denant dal judiç pe udience preliminâr Carlotta Silva, il procès pal omicidi colpôs dal fantat di 18 agns che al studiave tal Bearzi di Udin, copât di un incident tal so ultin di’ di stage inte aziende metalmecaniche.
Il judiç al à condanât Claudio Morandini, l’operari che chel di’ al stave lavorant cun Lorenzo, a 3 agns di reclusion e Emanuele De Cillia, il tutor dal fantat, a 2 agns e 4 mês di reclusion. Par ducj i doi a son stadis esclududis lis atenuantis gjenerichis. Il judiç al à ancje dât il so assens al patizament a 3 agns di reclusion par Pietro Schneider, rapresentant legâl de Burimec e al paiament di 23 mil euros de bande de aziende. (a.d.g.) – 29.10.2024
