Gnot di Sant Nicolau particolâr intal centri di Udin. Un automobilist in dificoltât serie, îr di sere, cu la sô Bmw al è lât jù dilunc de scjalinade dal santuari de Beade Vergjine des Graciis. La sene e je stade filmade tor lis dîs e mieze di sere di cui che in chel moment al jere presint in Zardin Grant, tra il Love Street Food e il ristorant “Ciò che C’era”. Un video in particolâr al è daûr a passâ di un telefon a chel altri, fasint ridi, ma ancje tirant sù dubis. A pericul di dam, di fat, a jerin i gradons monumentâi che a puartin ae Basiliche, costruide tacant dal 1567.
Di ce che si pues capî dal filmât, il vuidadôr al varès cjapât par erôr l’acès pedonâl antîc al santuari, chel che al côr dongje la Roie di Palme. Cence rivâ plui a fâ inversion, la persone al volant e à cussì decidût di lâ jù pe scjalinade, passant a planc a planc un scjalin ae volte. (a.d.g.) – 07.12.2023
