Par evitâ l’impat cuntri un altri veicul che al rivave di chel altri sens di marcje, un furgon cuntune cele frigo de Pupulin Group al è finît cuintri une cjase disabitade a Varian di Basilian. L’incident al è capitât cheste matine, aes 8.15 in vie Oberdan.
Intal impat il furgon al à centrât une des colonis puartantis dal edifici antîc, tant di causâ la colade di une part de struture, in particolâr dal solâr e dal cuviert.
La corse dal furgon e je terminade dopo cuintri i contadôrs di gas metan di une altre cjase. Cundut de pôre, il conducent dal mieç no si è fat nuie. Sul puest a son intervignudis daurman dôs scuadris des Vuardiis dal fûc, intune cui tecnics, che a àn lavorât a lunc par contignî e sierâ lis pierditis di gas.
I pompîrs, cul funzionari di vuardie Christian Marton, a àn proviodût cun di plui a meti in sigurece il stabil. Par precauzion, su disposizion dal sindic, un trat di strade di vie Oberdan al è stât sierât ae circolazion dai mieçs fin cuant che no si procedarà a meti in complete sigurece il cjasâl. I rilêfs dal incident a son stâts dâts ae polizie locâl dal Distret Friûl di mieç. (a.d.g.) – 02.02.2024
(Foto: Adriano Venturini)
