80
Il Guvier al à stanziât altris 42 milions e 170 mil euros par finî di paiâ i dams dal brut timp dal Istât dal an passât. Chescj bêçs a fasin part dal stanziament di 178 milions par dute Italie su propueste dal ministri de Protezion Civîl Musumeci.
La sume e paiara’ in part i dams patîts di fameis e ativitâts economichis ai 13 di Lui e ai 6 di Avost dal 2023, cuant che a jerin stadis fiscadis lis zonis di Mortean, Sacîl e Brugnere, cun centenârs di cuvierts, autos, cjasis e capanons fiscâts.
Chescj bêçs si zontin ai 7 milions za tirâts fûr dal Guvier a pro de nestre regjon subite dopo dal disastri. Cun di plui, a van calcolâts i 150 milions metûts a disposizion de Regjon Friûl-Vignesie Julie. (a.d.g.) – 30.08.2024
