Par Andreson Vasquez Dipre, imputât dal omicidi di Ezechiele Mendoza Gutierrez, ferît e copât par un colp tirât cul stoc di un cjaliç la matine dal Prin dal an dal 2024, intal locâl Ai laghetti Alcione, il sostitût procuradôr Elisa Calligaris al à domandât l’ergastul vuê di matine tal procès che si ten tal tribunâl di Udin.
Pe acuse, il domenican di 34 agns al veve batût di pueste la vitime, che si jere dimostrade amie, par cause di une cuistion leade a une fantate e par ciertis peraulatis, fat sucedût un an prime. Pal Procuradôr Andreson al veve agjît cu la intenzion di copâ o di fâ une vore mâl Ezechiele fûr dal locâl, parcè che al saveve che in chel puest la telecjamare e jere rote: al veve cussì rot un cjaliç e cjapât il stoc, po al veve dât intor di une persone che al saveve jessi cjoche. Il sassin dopo nol veve judade la vitime e nol veve clamât i socors. (a.d.g.) – 10.04.2025
